திருப்பத்தூர்: ஆம்பூர் அடுத்த மாதனூர் பகுதியில் இயங்கி வரும் அரசு மேல்நிலைப்பள்ளியில் பன்னிரண்டாம் வகுப்பு தாவரவியல் ஆசிரியராக பணிபுரிபவர் சஞ்ஜெய், இவர் கடந்த ஒரு மாதத்திற்கு முன்பு ராணிப்பேட்டை மாவட்டம் சோளிங்கர் பகுதியிலிருந்து பணிமாறுதல் பெற்று தற்போது அரசு மேல்நிலைப்பள்ளியில் பணியாற்றி வருகிறார்.
இந்நிலையில் அதே பள்ளியில் பன்னிரண்டாம் வகுப்பு பயிலும் மாணவர் ஒருவர் ஆசிரியரைத் தாக்க முற்படும் வீடியோ வெளியாகிப் பரபரப்பை ஏற்படுத்தியுள்ளது. பொதுத் தேர்வு நெருங்கி வரும் நிலையில் தாவரவியல் ஆசிரியர் செய்முறைத் தேர்விற்காகக் கொடுக்கப்பட்ட வீட்டுப்பாடத்தை சமர்ப்பிக்கும் படி கூறியுள்ளார்.
அப்பொழுது அந்த மாணவன் ஆசிரியர் முன்னரே வகுப்பறையில் பாய் போட்டுப் படுத்துள்ளான். இதனை ஆசிரியர் தட்டிகேட்ட போது ஆசிரியரே தாக்க முயன்றுள்ளான். இதனை சக மாணவர்கள் செல்போனில் பதிவு செய்துள்ளனர்.
இந்த நிலையில் அந்த வீடியோ தற்போது சமூக வலைத்தளங்களில் வேகமாகப் பரவி வருகிறது. இச்சம்பவம் குறித்து வாணியம்பாடி வருவாய் கோட்டாட்சியர் காயத்ரி சுப்பிரமணியம் மற்றும் ஆம்பூர் வட்டாட்சியர் பழனி பள்ளி தலைமையாசிரியர் வேலன் தலைமையில் விசாரணை நடைபெற்றது.
இதையும் படிங்க:பட்டாகத்தியுடன் பள்ளி மாணவர்கள்! பக்குவமாய் எடுத்துரைத்த போலீஸார்
